Actus consecrationis Fraternitatis Sacerdotalis Sancti Pii Decimi Sancto Joseph

O Joseph gloriosissime, Immaculatae Virginis sponse ac Filii Dei nutritie, sanctae familiae praeses totiusque Ecclesiae patronus caelestis constitutus ; qui tua fide dubium superasti, castissimam pariter ac justissimam vitam peregesti, obedientia sapientiam demonstrasti, fortitudine prudentiam roborasti, magnitudinem cum humilitate conjunxisti ; exemplar laborantium, spes militantium, terror daemonum adversus Redemptoris opus saevissime renitentium ; qui omni virtutum ope Verbum incarnatum a gravissimis periculis praeservasti tuoque patrocinio caelesti ejusdem mysticum corpus, ab hostium suorum novis semper incursibus exercitatum, in praesenti conteges ; respice, quaesumus, super hanc humillimam partem dominici gregis quam inscrutabili suo proposito Deus excitavit, ad catholicum sacerdotium fidemque integre conservandam.

Ex sese nihil posse conscia, potenti tamen patrocinio tuo incessanti confidentia innixa, o Joseph, patriarcha beatissime, Fraternitas Sacerdotalis Sancti Pii decimi plane totam tibi se devovet, omnibus cum suis membris operibusque, ad gloriam tuam virtutesque magis ac magis exaltandas. Dignare hanc devotionem nostram retribuere, tu qui Regis aeternae gloriae largitiones magnifice dispensare soles, ideoque fac hanc tuam parvulam societatem eadem beneficia recipere quae toti Ecclesiae paterno tuo affectu semper dispertisti. Dignare eam sicut tuam peculiarem portionem tueri. Fac, quaesumus, eam in statutis suis semper fidelem permanere, de sacro altaris sacrificio jugiter vitam haurire ejusdemque fructus omnibus animis indesinenter propinare. Tribue etiam ut de die in diem per Spiritus Sancti gratiam intus proficiat. Concede insuper nos ejusdem societatis membra in sanctitate et in castitate stabiliri ad mensuram nostrae religionis, in sanctis apostolatus laboribus perpetiendis animi fortitudinem incessanter invenire.

Da nobis praecipue sancto tuo ductu bonum fidei certamen feliciter certare, hostiles insidias superare atque de sancta Dei Ecclesia bene promerere. Praesta tandem, fidelis noster intercessor, ut haec humilis legio ad Christi regnum resuscitandum excitata Romano Pontifici firmissimum subsidium semper afferat viamque paret eidem confirmandi fratres suos in illa nitida et integraque beati Petri professione : Tu es Christus Filius Dei vivi. Quem Dei Providentia a dextris Mariae Reginae collocavit, confidimus apud Jesum, summum sacerdotem et regem aeternae gloriae efficacissimo tuo interventu nobis ita profuturum ut ejusdem Jesu Christi divinitatem, sacerdotium regnumque cum omnibus sequelis suis per totam vitam nostram retineamus et aliis praedicemus, qui cum Patre et Spiritu Sancto vivit et regnat in saecula seculorum. Amen.